Volleyball: U Rwanda rwatsinze Algeria ku mukino wa mbere mu gikombe cya Afurika
Ikipe y’u Rwanda y’abagore ya Volleyball yatangiye neza igikombe cya afurika cya 2026, itsinda Algeria amaseti 3-0 mu mukino wa mbere wo mu Itsinda D muri iri rushanwa riri kubera i Nairobi muri Kenya.
Yanditswe na Kayitankore Dieudonné•
Uyu mukino wabaye kuri uyu wa kabiri tariki wa 25 Kanama 2026 muri Ulinzi Complex Hall muri Kenya, ahari kubera aya marushanwa.
U Rwanda rwatsinze amaseti yose uko ari atatu, aho rwatsinze iya mbere ku manota 25-22, iya kabiri kuri 25-20 ndetse n’iya gatatu kuri 25-16. Kapiteni w`ikipe y`uRwanda Munezero Valentine, yagize uruhare rukomeye muri iyi ntsinzi, nyuma yo gutsinda amanota 16 muri uyu mukino.
Mu bandi bakinnyi bigaragaje harimo Tuyishime Aloysie watsinze amanota 14 na Dusabe Flavia watsinze amanota 10, ari nayo yinjijwe na Abderrahim watsinze amanota menshi ku ruhande rw`ikipe ya Algeria.
Ikipe y’u Rwanda, iyobowe n’umutoza w’umufaransa Frédéric Guerin, izasubira mu kibuga ku wa gatatu ikina na Repubulika Iharanira Demokarasi ya Congo.