Volleyball: U Rwanda rwatomboye RDC n’u Burundi mu gikombe cya Afurika
Ikipe y’igihugu ya Volleyball y’abagore yisanze mu Itsinda D hamwe na Algeria, Repubulika Iharanira Demokarasi ya Congo n’u Burundi mu Gikombe cya Afurika, CAVB Nations Championship 2026.
Yanditswe na Kayitankore Dieudonné•
Iri rushanwa riri kubera mu Mujyi wa Nairobi muri Kenya, rizasozwa ku wa 5 Nzeri 2026.
Tombola y’uburyo ibihugu 15 bizahura mu matsinda yabaye ku mugoroba wo ku wa Mbere. Maroc yari mu bihugu byari gukina iri rushanwa ariko yikuramo ku munota wa nyuma.
U Rwanda rwisanze mu Itsinda D hamwe na Algeria, Repubulika Iharanira Demokarasi ya Congo n’u Burundi.
Itsinda A rigizwe na Kenya yakiriye irushanwa, Mali na Zambia naho Itsinda B ririmo Misiri, Uganda, Burkina Faso na Sénégal. Ni mu gihe Itsinda C rigizwe na Cameroun, Nigeria, Tunisia na Ghana.
Biteganyijwe ko Ikipe y’Igihugu y’u Rwanda itangira irushanwa ikina n’iya Algeria kuri uyu wa Kabiri.
Ubwo u Rwanda rwaherukaga gukina igikombe cya Afurika mu 2023, rwegukanye umwanya wa kane inyuma ya Misiri, Kenya na Cameroun.