VOLLEYBALL: Niyogisubizo Samuel yasubiye muri Kirehe VC
Niyogisubizo Samuel, yongeye gusubira muri Kirehe Volleyball Club, aho yasinye amasezerano y’imyaka ibiri azamugeza mu 2028.
Yanditswe na Ishimwe Walter•
Uyu mukinnyi w’imyaka 31 yongeye kwerekeza muri Kirehe VC nyuma y’imyaka isaga umunani yari amaze ayivuyemo. Yari aheruka kuyikinira muri shampiyona ya 2017/18, ubwo yafashaga iyi kipe kurangiza ku mwanya wa kane muri shampiyona.
Muri 2018 muri Kirehe, Niyogisubizo n’abakinnyi bagenzi be bitwaye neza begukana irushanwa rya Carré d’As.
Kugaruka kwa Niyogisubizo bifatwa nk’inyongera ikomeye kuri Kirehe VC, cyane ko iyi kipe yitegura umwaka w’imikino wa 2026/27 uzatangira tariki ya 16 Ukwakira 2026.
Kirehe VC izaba ishaka kuzamura umusaruro wayo ugereranyije n’umwaka w’imikino wa 2025/26, aho yarangije ku mwanya wa karindwi muri shampiyona.
Niyogisubizo yatangiye gukina Volleyball muri Kigali Volleyball Club (KVC), aho yagize uruhare mu gufasha iyi kipe kwegukana igikombe cy’umukino wa Volleyball mu bagabo mu mikino ya karindwi ya EALASCA (East African Local Authorities, Sports and Culture Associations) yabaye mu 2015.
Mu 2018, Niyogisubizo yerekeje muri UTB, ayifasha kurangiza ku mwanya wa gatatu muri shampiyona. Muri uwo mwaka kandi, yatwaye igihembo cy’umukinnyi wahize abandi muri shampiyona isanzwe, kizwi nka MVP.
Nyuma yaho, yakiniye Gisagara VC nyuma gato y’icyorezo cya COVID-19, mbere yo kwerekeza muri Rwanda Energy Group (REG) mu 2023.
Nyuma yo gukinira REG, Niyogisubizo yongeye gusubira muri Gisagara VC, mbere yo kongera kwerekeza muri Kirehe VC aho azakina mu myaka ibiri iri imbere.