U Rwanda rwongeye kugaragaza uruhare mu muryango w’ibihugu bikoresha Igifaransa

Ifoto: Perezida Kagame na Madame Jeannette Kagame bageze muri Cambodia mu nama ya Francophonie

U Rwanda rwongeye kugaragaza uruhare mu bikorwa by’Umuryango Mpuzamahanga w’Ibihugu bikoresha Igifaransa (OIF), nyuma y’uko Perezida Paul Kagame na Madamu Jeannette Kagame bageze i Phnom Penh muri Cambodia ku wa 12 Ugushyingo 2026, aho bagiye kwitabira inama ya 20 ihuza abakuru b’ibihugu na za Guverinoma bigize uyu muryango, izaba kuva ku wa 14 kugeza ku wa 16 Ugushyingo 2026.

Iyi nama izahuza abayobozi b'ibihugu n'uturere bigize OIF, bakazaganira ku bufatanye mpuzamahanga, amahoro, iterambere rirambye n'uruhare rw'imiryango mpuzamahanga mu gukemura ibibazo byugarije isi.

Insanganyamatsiko y'iyi nama igira iti: “Kongera gushora imbaraga mu mahoro kugira ngo habeho iterambere risangiwe n'umutekano urambye.” Igaragaza ko amahoro n'umutekano ari inkingi zikomeye mu kubaka iterambere rirambye kandi rigera kuri bose.

Umuryango Mpuzamahanga w'Ibihugu bikoresha Igifaransa (OIF) uhuza ibihugu n'uturere bisangiye ururimi rw'Igifaransa, ukaba ufite inshingano zo guteza imbere urwo rurimi, ubufatanye mu bya politiki, uburezi, umuco n'iterambere rirambye.

Inama nk'izi zitanga urubuga ku bakuru b'ibihugu na za Guverinoma rwo kungurana ibitekerezo ku bibazo bihuriweho, gushaka ibisubizo binyuze mu bufatanye no gushimangira umubano hagati y'ibihugu bigize uyu muryango.

Uru ruzinduko rwa Perezida Kagame muri Cambodia kandi rurimo ibiganiro bigamije kurushaho gushimangira umubano w'ibihugu byombi. Biteganyijwe ko agirana ibiganiro n'Umwami Norodom Sihamoni, Perezida wa Sena Hun Sen, Perezida w'Inteko Ishinga Amategeko Khuon Sudary na Minisitiri w'Intebe Hun Manet.

Muri uru ruzinduko kandi hateganyijwe gusinywa amasezerano y'ubufatanye hagati y'u Rwanda na Cambodia mu nzego zirimo ubucuruzi, ishoramari, ubwikorezi bwo mu kirere n'ubukerarugendo.

Inama ya 20 ya OIF izabera i Phnom Penh kuva ku wa 15 kugeza ku wa 16 Ugushyingo 2026, mu gihe ku wa 14 Ugushyingo hazaba inama ya 48 y'abaminisitiri bashinzwe ibibazo bya Francophonie.

Iyi nama kandi izaba umwanya wo kuganira ku miyoborere y'umuryango, hanatorwe Umunyamabanga Mukuru mushya wa OIF. Umunyarwandakazi Louise Mushikiwabo, usanzwe kuri uwo mwanya kuva mu 2019, ari mu bahatanira gukomeza kuyobora uyu muryango.

U Rwanda rukomeje kugaragara mu bikorwa by'uyu muryango, binyuze mu kwitabira ibiganiro n'inama bigamije gushimangira ubufatanye hagati y'ibihugu bisangiye ururimi rw'Igifaransa.