Semi-Marathon: Tuyambaze Tabitha yegukanye umudali wa Feza mu Bufaransa
Umunyarwandakazi Tuyambaze Tabitha, yasoreje ku mwanya wa kabiri mu isiganwa rya Semi-Marathon du Lion 2026’ryabereye mu bufaransa, yegukana umudali wa feza.
Yanditswe na Kayitankore Dieudonné•
Iri siganwa ryabaye ku cyumweru tariki ya 27 Nzeri 2026, ryabaga ku nshuro yaryo ya 41. Ryitabiriwe n’abasaga 6600 bakinnye mu byiciro binyuranye, barimo 3049 bakinnye igice cya Marathon (semi-marathon) kingana n’ibilometero 21.
Mu bagore hari hitabiriye abakinnyi 953, aho umudali wa Zahabu wegukanywe n’umunya-Djibouti Kadra Mohamed Dembil wakoresheje isaha imwe, iminota 12 n’amasegonda 23.
Yakurikiwe n’umunyarwandakazi Tuyambaze Tabitha wakoresheje isaha, iminota 14 n’amasegonda 13, mu gihe umufaransakazi Ophélie Claude-Boxberger yabaye uwa gatatu akoresheje isaha, iminota 14 n’amasegonda 52.
Mu gihe Tabitha yegukanye umudali, undi Munyarwanda witabiriye iri siganwa ni Muhitira Félicien ‘Magare’, utabashije kuza muri batatu ba mbere mu cyiciro cy’abagabo cyarimo abakinnyi 2096.
Muhitira yasoreje ku mwanya wa gatanu akoresheje isaha, iminota itatu n’amasegonda 57.Yarushijwe umunota umwe n’amasegonda 17 n’umunya-Kenya Naibei Kiplimo Mayebei wegukanye umudali wa Zahabu.
Umwanya wa kabiri wegukanywe n’umunya-Kenya Salem Hassan Khalid Kibet, wakurikiwe ku mwanya wa 3 n`umunya-Maroc Mouhcine Outalha.
Iri siganwa ryatangiriye i Montbéliard rigasorezwa i Belfort, ryarimo kandi ibyiciro byo gusiganwa ibilometero 10 n’ibilometero bitanu ku batarabigize umwuga.