Rwanda Premier League: Abanyabigwi bagenewe imyanya muri sitade

Ubu buryo bugaragara mu ibaruwa Rwanda Premier League yandikiye amakipe yose akina BK Pro League, burimo gushyiraho ahagenewe abanyabigwi hazwi nka “Legends Corner”, kunoza uburyo amatike agenerwa RPL n’abafatanyabikorwa bayo atangwa ndetse no gushishikariza amakipe kwinjiza abana muri sitade ku buntu.

Rwanda Premier League yashyizeho gahunda yo kugena imyanya ku bakinnyi bakanyujijeho, abatoza n`abasifuzi muri stade zabereyemo imikino ya shampiyona y`icyiciro cya mbere mu Rwanda.

Mu rwego guha agaciro uruhare abahoze bakinira Ikipe y’Igihugu, ‘Amavubi’, abatoza, abayobozi ba tekinike n’abasifuzi, bagira mu iterambere ry’umupira w’amaguru mu Rwanda, Rwanda Premier League yategetse amakipe gushyiraho ahantu hihariye hazajya hicara abo mu byiciro byavuzwe haruguru.

Muri iyo gahunda, hagaragamo ko ikipe yakiriye umukino ifite uburenganzira bwo kwinjiza abakinnyi bahoze bayikinira.

Muri sitade zifite imyanya iri munsi y’ibihumbi bitanu, ikipe yakiriye umukino izajya iteganya imyanya 25 ya 'Legends Corner', naho sitade zifite imyanya irenga ibihumbi bitanu, hazajya hateganywa imyanya 50.

Iyi gahunda igamije gufasha abanyabigwi n’abandi bagize uruhare mu iterambere ry’umupira w’amaguru, gukomeza gukurikirana imikino ya BK Pro League no gukomeza kugira uruhare mu iterambere ry’uyu mukino.

Ishyirahamwe ry’abakinnyi, Footballers Association for Player Advocacy (FAPA), ku bufatanye n’ishyirahamwe ry’abatoza, Association of Football Coaches in Rwanda (AEFR), bazajya bategura urutonde rw’abemerewe kwinjira muri iyi myanya, aho ruzajya rugezwa ku ikipe yakiriye umukino ku munsi wawo.

Biteganyijwe ko iyi myanya izajya itegurwa ahantu hatwikiriye neza muri sitade cyangwa mu gice cya VIP, bitewe n’imiterere ya stade. Iyi myanya ntabwo izajya igurishwa cyangwa ngo ishyirwe muri sisitemu ikoreshwa mu kugurisha amatike.

Iyi gahunda izatangira gushyirwa mu bikorwa guhera ku munsi wa gatanu wa BK Pro League 2026/2027.