RIB itangazaza ko ibyaha Shema Fabrice akurikiranyweho ntaho bihuriye na FERWAFA
Umuvugizi wa RIB, Dr. Murangira B. Thierry yavuze ko ibyaha Shema Ngoga Fabrice, uyobora ishyirahamwe ry’umupira w’amaguru mu Rwanda (FERWAFA), akurikiranyweho, ntaho bihuriye na FERWAFA kuko bishingiye ku gutanga ‘cheque’ itazigamiye mu mirimo ye bwite yakoraga ku ruhande.
Yanditswe na Kayitankore Dieudonné•
Shema Fabrice yatawe muri yombi ku wa 11 Kanama 2026. Amakuru yahise atangira gucicikana ku mbuga nkoranyambaga yahuzaga ibyo afungiye n’ishyirahamwe ry’umupira w’amaguru mu Rwanda.
Mu kiganiro n`itangazamakuru, umuvugizi wa RIB, Dr Murangira B. Thierry , yavuze ko icyaha Shema Fabrice akurikiranyweho nta sano gifitanye na FERWAFA.
Yagize ati “Akurikiranyweho gutanga sheki itazigamiye, iperereza rirakomeje. Ni sheki ijyanye n’imirimo yakoraga. Kugeza aho nta kindi twatangaza, ndetse haveho n’ibindi bintu twumva by’urujijo abantu bamwe batera bavuga ibintu bitari byo. Ubu ni bwo butumwa bwemewe. Ni imirimo ye bwite, ntaho ifite ihuriye na FERWAFA. Icyo akurikiranyweho na sheki itazigamiye, ni ijyanye n’akazi ke bwite.”
Shema Fabrice ni umuyobozi Mukuru wa Africa Medical Suppliers, gicuruza ibikoresho by’ubuvuzi mu Rwanda.
Shema Ngoga yatorewe kuyobora FERWAFA ku wa 30 Kanama 2025, nyuma yo gutorerwa mu nteko rusange isanzwe hamwe n’abagize komite nyobozi ayoboye, aho bose hamwe biyise “Dream Team”.
Nyuma y’igihe gito yari amaze ku buyobozi, uyu mugabo wavuye muri AS Kigali yabereye Perezida wayo, yagaragaje impinduka uhereye muri ruhago y’abagore, iy’abakiri bato, kubaka ibikorwaremezo n’ibindi.
Akigera muri FERWAFA , yiyemeje ko atazigera afata amafaranga ibihumbi 200$ yari kuzahembwa mu myaka ine, ahubwo ko aziyongera ku yo kuzamura impano z’abato.
Shema Fabrice yamaze imyaka itandatu ari Perezida wa AS Kigali, aho mu bihe bitandukanye yafashije iyi kipe y`umujyi wa Kigali kwegukana igikombe cy’Amahoro cya 2019 n’icya 2022, ndetse n’igikombe cya Super Cup cya 2022.