Rayon Sports yaguze myugariro ukomoka muri Côte d’Ivoire
Nyuma yo kwegukana CECAFA Kagame Cup Ikipe ya Rayon Sports yongeye imbaraga mu bwugarizi bwayo, nyuma yo kwemeza ko yasinyishije myugariro w’Umunya-Côte d’Ivoire, Mohamed Ouattara.
Yanditswe na Ishimwe Walter•
Uyu mukinnyi mushya yatangajwe ku mugaragaro na Rayon Sports mu ijoro ryo ku Cyumweru, aho iyi kipe yamuhaye ikaze ibinyujije ku mbuga nkoranyambaga zayo.
Ouattara ni umukinnyi ufite ubunararibonye mu mupira w’amaguru wo ku mugabane wa Afurika, dore ko amaze gukinira amakipe azwi cyane mu bihugu bitandukanye.
Muri Maroc, yakiniye Wydad Casablanca hagati ya 2018 na 2020, mbere yo kwerekeza muri Sudani aho yakiniye Al Hilal kuva mu 2020 kugeza mu 2022. Nyuma yaho yakomereje muri Tanzania muri Simba SC, ayikinira kuva mu 2022 kugeza mu 2023.
Uyu myugariro kandi yagiye gukina hanze ya Afurika, ubwo yakinnye muri Al Ain yo muri Leta Zunze Ubumwe z’Abarabu, ikipe yakiniye kuva mu 2023 kugeza mu 2024.
Kuza kwa Mohamed Ouattara muri Rayon Sports byongereye amahitamo umutoza afite mu mutima w’ubwugarizi, aho asanze Nshuti Didier, Matumona Wakonda Kanda Abbel na Charles Tchouplaou basanzwe bakinamo.
Amakuru aturuka muri Rayon Sports, avuga ko abatoza batanyuzwe n`umusaruro w`umunye-Congo, Matumona Wakonda, byaje gutuma baha amahirwe umunyarwanda ukiri muto Nshuti Didier.
Rayon Sports ikomeje uyu murongo wo kongera imbaraga mu ikipe nyuma yo kwegukana igikombe cya CECAFA Kagame Cup 2026, aho ubu iri kwitegura andi marushanwa akomeye. Rayon Sports izitabira Super Cup iteganyijwe hagati ya tariki ya 22 n’iya 28 Kanama 2026, aho izatangira ihura na Police FC.
Nyuma ya Super Cup, Rayon Sports izakomereza muri BK Pro League ndetse no muri CAF Confederation Cup 2026/27. Muri iri rushanwa ryo ku rwego rw’Afurika, tombora yemeje ko izahura na Panthère Sportive du Ndé yo muri Cameroun mu ijonjora rya mbere.