Rayon Sports WFC : Umutoza Rwaka Claude yiyemeje kubona itike ya CAF Women's Champions League
Umutoza mukuru w`ikipe ya Rayon Sports y`abagore (Rayon Sports WFC), Claude Rwaka, yavuze ko intego y'ikipe ye ari ukurushaho kurenga ku musaruro yagezeho umwaka ushize no kubona itike yo gukina CAF Women's Champions League, nyuma y'uko hamenyekanye amakipe bazahura mu mikino yo gushaka itike y`ikipe izahagararira akarere ka CECAFA mu 2026.
Yanditswe na Ishimwe Walter•
Tombola yabereye i Kigali ku wa 30 Nyakanga 2026, yashyize Rayon Sports WFC mu Itsinda A hamwe na Yei Joint Stars yo muri Sudani y'Epfo, Mafunzo WFC yo muri Zanzibar na Denden FC yo muri Eritrea. Ni itsinda rifatwa nk'irikomeye ariko rishoboka kuri Rayon Sports WFC, izaba ifite amahirwe yo gukinira imbere y'abafana bayo kuko iri rushanwa rizabera i Kigali kuva ku wa 21 kugeza ku wa 31 Kanama 2026.
Umutoza wa Rayon Sports WFC,Rwaka Claude, yavuze ko icyo bashyize imbere ari ukubanza kurenga amatsinda mbere yo gutekereza ibindi, yongeraho ko intego nyamukuru bafite ari ugutakisha itike y`igikombe cya Afrurika gihuza amakipe yabaye aya mbere iwabo mu bagore "CAF Women's Champions League".
Yagize ati "Dufite intego yo kurenza ibyo twagezeho umwaka ushize.Intego nyamukuru yacu ni ukurenga aho twageze mu irushanwa riheruka, tukanabona itike ya CAF CAF Women's Champions League.Ni irushanwa rikomeye, ariko kuba tuzakinira mu rugo tunashigikiwe n'abafana bacu."
Rayon Sports WFC igiye kwitabira iri rushanwa ifite icyizere gikomeye nyuma y'uko mu 2025 yanditse amateka yo kuba ikipe ya mbere y'abagore mu Rwanda yageze ku mukino wa nyuma w'irushanwa ryo gushaka itike ya CAF Women's Champions League mu karere ka CECAFA.
Icyo gihe urugendo rwabo rwagarukiye ku mukino wa nyuma batsinzwemo na JKT Queens yo muri Tanzania igitego 1-0 mu mukino wabereye muri Kenya, ubwo haburaga gato ngo bitabire amatsinda ya CAF Women's Champions League.
Aya majonjora azahuza amakipe 10 ahagarariye u Burundi, Djibouti, Eritrea, Ethiopia, Kenya, u Rwanda, Sudani y'Epfo, Tanzania, Uganda na Zanzibar, yose ahatanira itike imwe rukumbi ya CECAFA izerekeza muri CAF Women's Champions League.
Ugereranyije n'itsinda B n'itsinda C arimo amakipe afite amateka akomeye muri CECAFA, Itsinda A rya Rayon Sports WFC nta kipe irimo yigeze yegukana iri rushanwa, ibintu biha ikipe yo mu Rwanda amahirwe afatika yo gusoza ari iya mbere.
Ikindi Rayon Sports WFC yishingikirijeho ni ugukomeza kugira umubare munini w'abakinnyi bakinanye umwaka ushize, bafite uburambe bwo gukina amarushanwa akomeye yo mu karere ndetse bazi neza icyo bisaba kugira ngo bahatane ku rwego rwo hejuru.
Ikipe izasoza ari iya mbere muri aya majonjora azabera i Kigali ni yo izahagararira CECAFA muri CAF Women's Champions League, aho amakipe yabaye aya mbere iwayo muri Afurika azahatanira igikombe cy'uyu mugabane.