Rafael York yasubiye muri Suède
Umukinnyi w`ikipe y`igihugu y`u Rwanda, Rafael York, yamaze gusubira muri Suède nyuma yo gusinyira ikipe ya IK Brage avuye muri FC Anyang yo muri Koreya y’Epfo.
Yanditswe na Ishimwe Walter•
IK Brage iba mu mujyi wa Borlänge yatangaje yasinyishije York, bityo asoza urugendo rw’igihe gito yari amaze muri FC Anyang.IK Brage ni ikipe ikina muri shmpiyona y`icyiciro cya kabiri muri Suède.
Iyi kipe yagize iti: “Ubu uyu mukinnyi wo hagati w’imyaka 27 yiteguye gukinira IK Brage no kwambara umwambaro w’icyatsi n’umweru.” Yongeyeho iti: “Turakwakiriye neza muri IK Brage, Raphael York!”
York yagiye muri IK Brage nyuma y’ibihe bitamworoheye ariko byamuhaye ubunararibonye.Rafael aheruka guhamagarwa mu ikipe y`igihugu y`u Rwanda muri Gicurasi 2026.
Mu ntangiriro za 2026, uyu mukinnyi yari muri FC Anyang yo mu cyiciro cya mbere muri Koreya y’Epfo. Yayikiniye imikino itandatu mu marushanwa yose, atanga umupira umwe wavuyemo igitego, nyuma yo kuyerekezamo muri Werurwe.
Mbere yo kujya muri Aziya, York yakiniye IK Oddevold muri shampiyona ya 2025, aho yatanze umupira umwe wavuyemo igitego mu mikino 12 ya shampiyona.
Mbere yaho, yari yaranyuze mu Misiri, aho yakiniye ZED FC yo muri shampiyona y’icyiciro cya mbere. Gusa muri iyi kipe yahakinnye umukino umwe gusa mbere yo gusubira muri Suède.
Kwerekeza muri IK Brage ni indi ntambwe nshya mu rugendo rwa Rafael York mu mupira w`amaguru. Uyu musore usatira aca ku ruhande yavukiye i Gävle, akaba amaze gukinira amakipe arimo Kalmar FF, Gefle IF, AFC Eskilstuna, ZED FC, IK Oddevold na FC Anyang.
IK Brage kandi yakomeje ibikorwa byo kwiyubaka muri iyi mpeshyi, kuko umunsi yatangaje ko yasinyishije Rafael York, ari nawo yatangaje ko yangeyeho umukinnyi wo hagati Jacob Stensson.