Police FC : Byiringiro Lague n`abandi batandatu basezerewe

Ikipe ya Police FC yatandukanye n`abakinnyi barindwi basoje amasezerano kubera umusaruro mucye. Muri abo harimo rutahizamu w`umunyarwanda Byiringiro Lague n`abanyamahanga batandatu.

Kuri uyu wa mbere tariki 8 kamena 2026, nibwo ikipe ya Police FC yatangaje ko yahisemo gutandukana n`abakinnyi 7 barangije amasezerano muri iyi kipe. Nkuko bigaragara ku mbuga nkoranyambaga zayo, abo bakinnyi 7 basezerewe barimo rutahizamu Byiringiro Lague, ari nawe munyarwanda rukumbi watandukanye n`iyi kipe y`igipolisi cy`uRwanda.

Byiringiro Lague yari amaze iminsi arangwa n`imyitwarire mibi yatumye atabwa muri yombi n`inzego z`umutekano. Ibi bikaba byaragize ingaruka ku musaruro we mu kibuga, bigatuma umutoza wa Police FC, Ben Moussa, atongera kumwifashisha mu mikino ya shampiyona yari isigaye muri uyu mwaka. Ibi byatumye ikipe ya Police FC ihitamo kutongera amasezerano ya Byiringiro Lague.

Mu bandi bakinnyi basezerewe n`ikipe ya Police,harimo abarundi 2, Msanga Henry ukina hagati na rutahizamu Richard Kirongozi. Umwe muri bo, Msanga Henry, ari mu biganiro n`ikipe ya Rayon Sport. Kuri abo, hiyongeraho abanya Nigeria 2 Chimezie David na Ani Elijah, umunya Ghana Issa Yakubu n`umugande Allan Kateregga.

Kugeza ubu, Police FC ntiratangaza ko yinjiye ku isoko ry’abakinnyi bashya nubwo hari abakinnyi bashobora kuyerekezamo. Mu bavugwa harimo umunyezamu Tuyizere Jean Luc, usoje amasezerano muri Mukura VS n`umukinnyi wo hagati Hoziyana Kennedy, nawe usoje amasezerano muri Marine FC.

Iyi kipe ya Police FC yarangije shampiyona y`umwaka wa 2025/26 iri ku mwanya wa gatandatu, iza gusezererwa na Rayon Sport muri kimwe cya 4 mu gikombe cy`amahoro. Ubuyobozi bw`iyi kipe y`igipolisi cy`uRwanda bukaba butishimiye uyu musaruro.