Mugisha Gilbert mu nzira zo kujya muri Jwaneng Galaxy yo muri Botswana
Umukinnyi w’ikipe y’igihugu ‘Amavubi’, Mugisha Gilbert, ari mu nzira zimwerekeza muri Botswana, aho ashobora gusinya muri Jwaneng Galaxy, imwe mu makipe akomeye muri icyo gihugu.
Yanditswe na Ishimwe Walter•
Uyu mukinnyi uheruka gutandukana na APR FC yamaze gutumirwa na Jwaneng Galaxy kugira ngo agere muri Botswana, aganire n’abayobozi b’iyi kipe ndetse anasoze ibijyanye n’amasezerano.
Mugisha yamaze kugera muri Botswana aho agiye mu biganiro bya nyuma n`ikipe ya Jwaneng Galaxy. Naramuka yumvikanye n’iyi kipe, biteganyijwe ko azasinya amasezerano y’imyaka ibiri.
Kwerekeza muri Jwaneng Galaxy bishobora gutuma Mugisha Gilbert yongera gukorana n’umutoza w’umubiligi, Ivan Minnaert, usanzwe amuzi dore ko yamutoje muri Rayon Sports.
Minnaert aherutse guhabwa inshingano zo gutoza Jwaneng Galaxy nyuma yo gutandukana na Vipers SC yo muri Uganda, aho yari amaze igihe atoza.
Jwaneng Galaxy ni imwe mu makipe akomeye kandi yubashywe muri Botswana. Iyi kipe izahagararira igihugu cya Botswana muri CAF Confederation Cup mu mwaka w’imikino utaha, nyuma yo kwegukana igikombe cy’igihugu.