Marine FC yasinyishije rutahizamu ukomoka muri Mali
Ikipe ya Marines FC yo mu Karere ka Rubavu yamaze gusinyisha rutahizamu w’Umunya-Mali, Naman Keita, wari usanzwe akinira Olympique Béja yo muri Tunisia, mu rwego rwo kongera imbaraga mu busatirizi.
Yanditswe na Ishimwe Walter•
Naman Keita,w’imyaka 24 , yasinye amasezerano y’imyaka ibiri muri Marines FC, aho aje kongera imbaraga mu busatirizi bw’iyi kipe iherutse gutakaza bamwe muri ba rutahizamu bayo.
Uyu munya-Mali, yakuriye mu makipe yo muri Mali, aho yakiniye Binga FC na AS Real Bamako, mbere yo kwerekeza muri Tunisia gukinira Olympique Béja.
Mu mibare dukesha Transfermarkt, Keita yakiniye Olympique Béja imikino umunani muri shampiyona ya Tunisia y’umwaka w’imikino wa 2025/26, ariko ntiyabashije gutsinda igitego. Iyo kipe yarangije shampiyona iri ku mwanya wa 13 mu makipe 16.
Mu myaka ibiri yamaze muri Olympique Béja, Naman Keita yakinnye imikino 14 , atsindamo igitego kimwe.
Naman Keita aje mu ikipe ya Marines FC kugira ngo azibe icyuho cya ba rutahizamu iyi kipe yatakaje harimo Mbonyumwami Taiba, werekeje muri Ethiopiya mu ikipe ya Ethiopian Coffee FC na Nizeymana Mubaraka, wagiye muri Rayon Sport.
Marines FC, itozwa na Rwasamanzi Yves, yakoze impinduka nyinshi mu bakinnyi, aho yamaze kwibikaho Sindi Paul Jesus wavuye muri Rayon Sports, Kabera Bonheur wavuye muri Etoile de l`Est , Iraguha Awad waturutse muri Etincelles , Ntirushwa Aimé wa AS Kigali ,Twizeyimana Innocent na Ishimwe Fiston wavuye muri Rayon Sports. Marine FC yanakiriye Niyibizi Ramadhan na Ishimwe Pierre, baje muri iyi kipe ku ntizanyo y’umwaka umwe bavuye muri APR FC.
Mu mwaka w`imikino ushize, ikipe ya Marines FC yasoje shampiyona iri ku mwanya wa 8.