Louise Mushikiwabo yagaragaje itandukaniro hagati ye n’abo bahataniye kuyobora OIF

Louise Mushikiwabo, uyoboye Umuryango w’ibihugu bikoresha ururimi rw’Igifaransa (OIF), yagaragaje ubunararibonye n’uburambe, ubushobozi, ndetse n'ubumenyi bwimbitse mu bikorwa bya Francophonie, bidakuyeho ko n’abandi bakandida bahatanye mu matora ateganyijwe mu Ugushyingo, bagaragaje ibyifuzo byabo mu guteza imbere uyu muryango bahuriyemo.

Ni mu gikorwa cyabaye mu nama ya 47 idasanzwe y'Inama y'Abaminisitiri b’ibihugu bigize umuryango w’ibihugu bikoresha ururimi rw’igifaransa (CMF), yabereye iParis mu Bufaransa, aho abakandida bane bahataniye umwanya wo kuyobora uyu muryango, buri wese yahawe iminota 20 yo kumurika imigabo n’imigambi ye, banasubiza ibibazo byabajijwe n'abaminisitiri mu gihe cy’iminota 35.

Minisitiri w’ububanyi n’amahanga w’uRwanda witabiriye iyi nama, Nduhungirehe Olivier, mu butumwa yashyize ku rubuga rwe rwa X, yatangaje ko iki gikorwa aribwo bwa mbere kibaye mu mateka ya Francophonie, ndetse ko cyashobotse binyuze mu mavugurura y'imiyoborere ya OIF yakozwe n'Umunyamabanga Mukuru uriho ubu, Louise Mushikiwabo.

Ibihugu 49 bigize Francophonie byari bihagarariwe muri iyo nama ya CMF, harimo abaminisitiri 23, barimo n'Abaminisitiri b'Ububanyi n'Amahanga b'ibihugu bine byatanze abakandida, ari byo Mauritania, Romania n’u Rwanda bitabiriye imbonankubone, mu gihe Repubulika Iharanira Demokarasi ya Kongo yo yitabiriye hakoreshejwe ikoranabuhanga.

Minisitiri Nduhungirehe, avuga ko nyuma y'ibazwa ry'abakandida, hagaragaye ibintu bibiri by'ingenzi.

Ati “Ibiganiro by'abakandida bose byabaye mu mwuka mwiza no kubahana. Abagore batatu bo muri Afurika hamwe n'umukandida umwe w'umugabo wo ku mugabane w'uBurayi, bavuze imigabo n’imigambi yabo nta guterana amagambo cyangwa guhangana hagati y'ibihugu cyangwa abakandida ubwabo. Banahuriye mu birori byo kubakira byateguwe na Perezida wa CMF wo muri Cambodge, bakomeza kuganira mu bwubahane no mu bwumvikane”.

Minisitiri Nduhungirehe akomeza avuga ko imiyoborere myiza yaranze ubuyobozi bwa Louise Mushikiwabo yagaragariye buri wese.

Ati: “Hari kandi itandukaniro ryagaragaye kuri bose: ku ruhande rumwe, hagaragaye ubunararibonye n’uburambe, ubushobozi, ndetse n'ubumenyi bwimbitse bya Louise Mushikiwabo ku bikorwa bya Francophonie, ku rundi ruhande, abandi bakandida batatu nabo bagaragaje ubushobozi bwabo. Icyakora, ibi ntibikuraho kuba buri mukandida yaragaragaje icyifuzo cye cyo guteza imbere uyu muryango bose bahuriyemo”.

Nyuma y’aha hazakurikiraho amatora nyirizina, azabera mu nama ya 20 y'Abakuru b'Ibihugu na za Guverinoma bigize Francophonie i Phnom Penh muri Cambodge ku wa 15 no ku wa 16 Ugushyingo 2026.

Muri iyo nama, Abakuru b'Ibihugu na za Guverinoma bazatora cyangwa bongere batore Umunyamabanga Mukuru wa OIF bashingiye ku myanzuro izafatwa n'abaminisitiri.