Julián Álvarez arashaka kuva muri Atlético Madrid kugira ngo asohoze inzozi ze

Uyu mukinnyi w'imyaka 26 y'amavuko, amaze iminsi avugwa ku isoko ry'igura n'igurisha ry'abakinnyi, aho amakipe akomeye arimo FC Barcelona na Paris Saint-Germain bivugwa ko amwifuza. Mu ntangiriro za Kamena kandi, Atlético Madrid yanze amafaranga angana na miliyoni 150 z'ama-euro yatanzwe na mukeba wayo Real Madrid kugira ngo imwegukane.

Kuri ubu Álvarez ari kumwe n'ikipe y'igihugu ya Argentine mu Gikombe cy'Isi cya 2026, aho yakinnye asimbuye mu mikino ibiri ya mbere nyuma yo gukira imvune yo ku kagombambari yari amaranye igihe.

Nyuma y'umukino Argentine yatsinzemo Austria, Álvarez yavuze ko yamaze kuganira n'abayobozi ba Atlético Madrid ku hazaza he.

Yagize ati: "Naganiriye n'abo nagombaga kuganiriza muri Atlético. Ntekereza ko icyiza kuri buri wese ari uko habaho kumvikana. Ndashaka gusohoza inzozi zanjye."

Yakomeje avuga ko nubwo atifuza kwibanda kuri icyo kibazo mu gihe ari mu Gikombe cy'Isi, adashobora gukomeza guhisha ikimuri ku mutima.

Ati: "Si cyo gihe cyo kubivugaho cyane, ariko sinshobora no kubihisha. Nkunda kuba umuntu uvugisha ukuri."

Álvarez yageze muri Atlético Madrid avuye muri Manchester City mu mpeshyi ya 2024 atanzweho amafaranga angana na miliyoni 81.5 z'amapawundi. Kuva icyo gihe, amaze gukinira iyi kipe imikino 106, atsinda ibitego 49 ndetse anatanga imipira 17 yavuyemo ibitego.

Mu mwaka we wa mbere muri Shampiyona ya Espagne (La Liga), yatsinze ibitego 17, ariko umusaruro we waragabanutse mu mwaka wa 2025-26 aho yatsinze ibitego umunani gusa.

Nubwo bimeze bityo, Álvarez yigaragaje cyane mu marushanwa ya UEFA Champions League, aho yatsinze ibitego 10 byafashije Atlético Madrid kugera muri 1/2 cy'irangiza. Icyakora, urugendo rw'iyi kipe rwahagaritswe na Arsenal FC yayisezereye muri icyo cyiciro.