Ibyo wamenya ku makipe azitabira CECAFA y’abagore izabera mu Rwanda
Harabura iminsi ibiri gusa kugira ngo irushanwa rya CAF Women’s Champions League CECAFA Qualifiers 2026, ritangizwe i Kigali, hagamijwe kumenya ikipe izahagarira akarere mu marushanwa Nyafurika ahuza amakipe yabaye aya mbere iwayo (CAF Women’s Champions League). Umwezi 95.3 FM wahisemo kubagezaho bimwe mu biranga amakipe 10 azitabira iri rushanwa rizatangira kuri uyu wa 5 tariki 21 Kanama 2026 i Kigali.
Yanditswe na Kayitankore Dieudonné•
CAF Women’s Champions League CECAFA Qualifiers ya 2026, izitabirwa n`amakipe 10 yashyizwe mu matsinda atatu. Itsinda rya mbere ririmo amakipe ane mu gihe irya kabiri n’irya gatatu harimo amakipe atatu. Mu itsinda A hazazamuka amakipe abiri mu gihe mu yandi matsinda ( B na C) hazazamukamo imwe, abe ane azahita ahurira muri ½ yishakemo ebyiri zizagera ku mukino wa nyuma.
Itsinda A ririmo ikipe ya Rayon Sports Women FC izaba ihagarariye u Rwanda, aho igomba guhangana na Yei Joint Stars FC yo muri Sudani y`Efpo,Mafunzo WFC (Zanzibar) na Denden FC yo muri Erithreya.
Rayon Sports WFC
Yashinzwe mu 2022, ihita itangira gukina muri Shampiyona y’icyiciro cya kabiri ya 2022-23 ndetse yegukana igikombe ihita izamuka mu cyiciro cya mbere kuva ubwo.
Imaze kwegukana ibikombe bitatu bya Shampiyona [2023-24, 2024-25 na 2025-26]. Imaze kwibikaho igikombe cy`Amahoro ku nshuro ebyiri harimo icya 2023-24 n’icya 2025-26.
Ni inshuro ya gatatu igiye gukina aya marushanwa. Mu mwaka ushize ubwo yitabiraga CAF Women’s Champions League CECAFA Qualifiers yabereye muri Kenya, yatsindiwe ku mukino wa nyuma igitego 1-0 na JKT Queens yo muri Tanzania. Kugeza ubu,Rayon Sports WFC itozwa na Rwaka Claude ufite Licence B-CAF ariko uri kwigira A-CAF.
Yei Joint Stars FC.
Kuva yashingwa mu mwaka wa 2019, iyi kipe imaze kwegukana ibikombe bibiri bya Shampiyona y`abagore muri Sudan y`Epfo [2021 na 2022]. Ni inshuro ya gatatu igiye kwitabira aya marushanwa Nyafurika, ikaba ri gutozwa na Esther Paul Khamis. Inshuro zose yitabiriye iri rushanwa, yasezerewe itarenze amajonjora.
Mafunzo WFC.
Ni ikipe ishamikiye ku ya basaza babo yitwa Mafunzo FC ikina Shampiyona y’iwabo muri Zanzibar. Yaje mu Rwanda yaregukanye igikombe cya Shampiyona y’umwaka ushize w’imikino 2025-26. Ni ikipe ifite amikoro ahagije nubwo itarubaka ibigwi binini mu mupira w’amaguru. Ifite abakinnyi benshi b’abanyamahanga baje kuyifasha kubaka ibigwi.
Denden FC.
Ni ikipe yashinzwe na Minisiteri y’Ingabo muri Eritréa. Ibarizwa mu Mujyiw a Asmara muri iki gihugu. Yegukanye ibikombe bibiri bya Shampiyona [2024 na 2025]. Umutoza wayo ni Rezene Gerbregiorgis Demoz. Ni ikipe nayo idafite ibigwi bikomeye muri ruhago y’abagore mu Karere ka Afurika y’i Burasirazuba no Hagati.
Itsinda B ririmo Commercial Bank Ethiopia FC yo muri Ethiopia, Kawembe Muslim Ladies yo muri Uganda na FC Ujeco yo muri Djibouti.
Commercial Bank of Ethiopia FC [CBE].
Iyi ikipe ifite izina rinini muri Shampiyona y’abagore muri Ethiopiya ndetse no mu Karere ka Afurika y’i Burasirazuba no Hagati. Ibitse ibikombe umunani bya Shampiyona imaze kweguka na kimwe cya CECAFA yegukanye mu 2024. Ku nshuro ebyiri, iyi kipe yegukanye ibikombe by’igihugu bibiri na kimwe cya Super Coupe.
Kawembe Muslim Ladies.
Ni ikipe yashinzwe mu 2015, ishingirwa mu Mujyi wa Kampala muri Uganda. Mu mwaka ushize, yegukanye igikombe cya Shampiyona y’umwaka wa 2025-26. Ni yo iyoboye ruhago y’abagore muri iki gihugu. Imaze kwegukana ibikombe bitandatu bya Shampiyona [2015, 2016, 2017, 2018, 2024 na 2026]. Muri 2024 yabaye iya Kabiri muri CECAFA.
FC Ujeco
Iyi kipe yo muri Djiouti, iyoboye umupira w’amaguru w’abagore muri icyo gihugu nyuma yo gutwara igikombe cya Shampiyona ya 2025-26. Mu rwego rwo kwiyubaka, yaguze abanyamahanga batandukanye barimo n’abanyarwandakazi batanu ndetse n’abandi bakomoka muri Ethiopia.
Itsinda C naryo rigizwe n`amakipe atatu ariyo Simba Queens yo muri Tanzania, Kenya Police FC yo muri Kenya na Top Girls Academy yo mu gihugu cy’u Burundi.
Simba Queens.
Ni ikipe ishamikiye kuri Simba SC ifite ibigwi muri Tanzania. Iri muri ebyiri zikomeye muri ruhago y’abagore muri iki gihugu. Niyo ibitse igikombe cya Shampiyona 2025-26.
Muri rusange, Simba Queens imaze gutwara ibikombe bitanu bya Shampiyona y’iwabo. Yegukanye igikombe cya CECAFA ya 2022. Ibyo bikaba bituma ifatwa nk`imwe mu makipe ahabwa amahirwe yo kwegukana iri rushanwa.
Kenya Police FC.
Ni ikipe ifite izina rinini muri ruhago y’abagore muri Kenya. Yegukanye igikombe cya Shampiyona 2025-26 ku nshuro ya gatatu yikurikiranya nyuma ya 2023-24 na 2024-25. Ni imwe mu zikomeye mu irushanwa ry’uyu mwaka rizabera i Kigali.
Top Girls Academy
Iyi kipe y`abakenyezi b`i Burundi, niyo yatwaye igikombe cya Shampiyona y’iwabo mu mwaka w`imikino wa 2025-26. Niyo iyoboye ruhago yo muri iki gihugu, ikaba ari nayo itanga abakinnyi benshi mu ikipe y’igihugu y’abagore. Top Girls Academy, ibarizwa mu Mujyi wa Ngozi, yashinzwe mu mwaka wa 2006. Iri mu makipe afite izina mu Karere ka Afurika y’i Burasirazuba no Hagati.
Ku ruhande rw`u Rwanda ruzakira iri rushanwa, umunyamabanga mukuru muri FERWAFA, Bonnie Mugabe, yatangaje ko hari ubufasha bahaye Rayon Sports WFC mu rwego rwo kuyifasha kwitegura neza. Mugabe yemeje ko muri iyi mikino, abafana bazabona ibijyanye n'imyidagaduro nkuko byagenze muri CECAFA Kagame Cup 2026 iheruka kwegukanwa na Rayon Sports.
Muri iri rushanwa, ikipe yegukanye igikombe cya CAF Women’s Champions League CECAFA Qualifiers, ihita ikatisha itike yo gukina CAF Women’s Champions League ndetse igahabwa ibihumbi 100$.