FIBA Intercontinental Cup: RSSB Tigers BBC yasoreje ku mwanya wa kane
RSSB Tigers BBC ihagarariye Afurika muri FIBA Intercontinental Cup 2026, yasoreje ku mwanya wa kane nyuma yo gutsindwa na Club Atlético Boca Juniors yo muri Argentine amanota 93-62 mu mukino wo guhatanira umwanya wa gatatu.
Yanditswe na Ishimwe Walter•
Uyu mukino wabaye ku Cyumweru tariki ya 27 Nzeri, nyuma y’uko amakipe yombi atabonye itike yo gukina umukino wa nyuma. Tigers BBC yari yatsinzwe na NBA G League United muri kimwe cya kabiri, mu gihe Boca Juniors yasezerewe na Rytas Vilnius yo muri Lithuania.
Mu ntangiriro z’umukino, Boca Juniors yagaragaje imbaraga nyinshi, cyane cyane mu gice cya mbere, bituma ibona umwanya wo gushyiramo ikinyuranyo kinini. Ikipe yo muri Argentine yarangije igice cya mbere iyoboye ku manota 52-29.
Tigers BBC yagarutse mu gice cya kabiri ishaka kugabanya ikinyuranyo no kongera amahirwe yo guhindura umukino, ariko Boca Juniors ikomeza kuyobora.
Nubwo RSSB Tigers yarushijeho gukina neza mu gice cya kabiri, ntibyabashije kuyifasha gusubira mu mukino. Boca Juniors yatsinze icyo gice amanota 41-33, bituma umukino wose urangira ku manota 93-62.
Iyi ntsinzi yahesheje Boca Juniors umwanya wa gatatu, mu gihe RSSB Tigers BBC yasoje iri rushanwa iri ku mwanya wa kane.
Kugera ku mukino wo guhatanira umwanya wa gatatu ni amateka akomeye kuri RSSB Tigers BBC, kuko yari ku nshuro yayo ya mbere yitabiriye FIBA Intercontinental Cup, ikaba kandi ibaye ikipe ya gatandatu yo muri Afurika ikoze aya mateka muri iri rushanwa.
Al Ahly Tripoli yo muri Libya ni yo kipe iheruka guhagararira Afurika muri FIBA Intercontinental Cup, aho yasoje iri rushanwa ku mwanya wa gatatu.