FERWAFA izajya ihabwa miliyari 1 Frw na CAF
Impuzamashyirahamwe ya Ruhago muri Afurika (CAF), ryatangaje ko inkunga igenerwa amashyirahamwe arimo na FERWAFA yavuye ku bihumbi 525$ akagera ku bihumbi 700$ [asaga miliyari 1,03 Frw], mu gihe impuzamashyirahamwe mu turere zizahabwa ibihumbi 900$.
Yanditswe na Kayitankore Dieudonné•
Ibi byatangajwe na Perezida wa CAF Dr. Patrice Motsepe, nyuma y’igihe gito hasojwe inama yahurije muri Cap-Vert abayobozi b’umupira w’amaguru muri Afurika, ku tariki ya 8 n’iya 9 Ukwakira 2026.
Kongera ubushobozi bw’amashyirahamwe ya ruhago muri Afurika, hongerwa amikoro yayo mu buryo butandukanye,ni kimwe mu byagarutsweho muri iyo nama.
Ni muri urwo rwego Perezida wa CAF, Dr. Patrice Motsepe, yatangaje ko ku nkunga yagenerwaga amashyirahamwe 54 buri mwaka, hiyongereyeho 33%, iva ku bihumbi 525$ [774.375.000 Frw], igera ku bihumbi 700$ [1.032.500.000 Frw].
Hongerewe kandi inkunga y’impuzamashyirahamwe z’uturere ibihugu bibarizwamo, aho yiyongeyeho 20%, iva ku bihumbi 750$ [1.106.250.000 Frw], igera ku bihumbi 900$ [1.327.500.000 Frw].
Ishyirahamwe ry’Amakipe muri Afurica (ACA), ryari risanzwe rihabwa ibihumbi 400$ [590.000.000 Frw], rizajya rihabwa ibihumbi 500$ [737.500.000 Frw].
Kuva mu 2021, inkunga igenerwa amashyirahamwe y`umupira w`amaguru iturutse muri CAF, imaze kuzamuka ku kigero cya 250%. Iyi nkunga ibonetse mu gihe n’ishyirahamwe ry’umupira w’amaguru ku Isi (FIFA), riteganya gutanga miliyoni 25$ kuri buri shyirahamwe ryo mu bihugu 211 birigize, muri gahunda yo guteza imbere umupira w’amaguru. Iyi gahunda izatwara miliyari 6,35$ mu myaka ine iri imbere.