FERWAFA izahabwa hafi miliyari 30 Frw

Nkuko byatangajwe na FIFA, iyi gahunda ikubiyemo inkunga yihariye ishobora gutangwa inshuro imwe ingana na miliyoni 20$ binyuze muri gahunda nshya yiswe “FIFA Fast Forward Programme (FFFP)”, izajya ifasha mu mishinga yihariye no kongera amafaranga asanzwe ahabwa ibihugu muri gahunda isanzwe ya “FIFA Forward”.

Muri iyi gahunda, amashyirahamwe y`umupira w`amaguru azwi nk`abanyamuryango ya FIFA, azajya ahabwa miliyoni 20 z’amadolari inshuro imwe hagati ya 2027-2030. Aya mafaranga yiyongereyeho miliyoni 12 z`amadolari dore ko avuye kuri miliyoni umunani z’amadolari yari asanzwe atangwa.

Ishyirahamwe ry`umupira w`amaguru ku isi, rikaba ryemeza ko aya mafaranga aziyongera akagera kuri miliyoni 22 z’Amadolari kuri buri shyirahamwe mu myaka ya 2031-2034, naho mu 2035-2038 akazagera kuri miliyoni 24 z’Amadolari.

FIFA yavuze ko amafaranga yiyongereye azafasha mu guteza imbere ibikorwaremezo by’umupira w’amaguru, umupira w’amaguru wo ku rwego rw’ibanze, abatoza, amakipe y’ibihugu, amarushanwa, ndetse n’umupira w’abagore.

Gusa, FIFA yasobanuye ko izakomeza kugira ububasha bwihariye ku micungire y`umushinga FIFA Forward Enterprise (FFE) no gufata ibyemezo byose bijyanye n’imiyoborere y’umupira w’amaguru, amarushanwa, ingengabihe y’imikino, amategeko n’ibindi byemezo bya siporo.

Muri iyi gahunda kandi, FIFA izagurisha imigabane mike mu bikorwa byayo by’ubucuruzi ku bashoramari bigenga, nubwo iyi ingingo ikomeje kunengwa n’impuzamashyirahamwe y’umupira w’amaguru ku mugabane w’u Burayi (UEFA).

Perezida wa FIFA, Gianni Infantino, yavuze ko iyi gahunda igamije gutuma iterambere ry’ubucuruzi mu mupira w’amaguru rigirira akamaro amashyirahamwe yose ayigize.

Ati “Umupira w’amaguru ni siporo ikunzwe cyane ku isi kandi ni imbarutso ikomeye y’iterambere ry’abantu n’imiryango. Inshingano zacu ni ukureba ko n’abandi bagize umupira w’amaguru bazamukana na wo. FIFA ibaho kugira ngo ishyigikire iterambere rirambye kandi ridaheza mu mpande zose z’Isi.”

Yakomeje agira ati “Buri shyirahamwe ry’umupira w’amaguru riri muri FIFA rigomba kugira amahirwe yo kubona umugabane ukwiye w’amafaranga ahari, kugira ngo rishobore kwiyubakira ejo hazaza haryo, rikifatira ibyemezo aho kwishingikiriza ku bandi. Ibi birebana no guha uburenganzira abantu bose mu mupira w’amaguru ku Isi.”

Ishyirahamwe ry`umupira w`amaguru ku isi, ryamenyesheje ko iyi gahunda izashyirwa mu bikorwa nyuma yo kwemezwa n’umubare munini w’amashyirahamwe manyamuryango ya FIFA ndetse n’Inama ya FIFA, hakurikijwe uburyo bwo gufata ibyemezo bugenderwaho n’iri Shyirahamwe.