CECAFA Kagame Cup : Ubutumwa bwa ministeri ya Siporo nyuma y`intsinzi ya Rayon Sports

Ubu ni ubutumwa Minisitiri wa Siporo, Nelly Mukazayire, yageneye ikipe ya Rayon Sports nyuma yuko ikatishije itike yo kugera ku mukino wa nyuma muri CECAFA Kagame Cup, itsinze Jamus SC yo muri Sudani y`Epfo mu mukino wa kimwe cya kabiri wabereye kuri Stade Pelé i Naymirambo kuri uyu wa kabiri tariki 4 kanama 2026.

Mu butumwa yanyujije ku rubuga rwa X, Nelly Mukazayire yabanje gushimira ikipe ya Rayon Sports ku ntsinzi yegukanye, anayisaba gukomereza kuri uwo muvuduko kugira ngo igere ku ntego imwe basigaranye.

Yagize ati ""Mukomeze uwo muvuduko, intego isigaye ni imwe gusa; kwegukana igikombe kuri uyu wa gatanu."

Umunyamabanga wa Leta muri Minisiteri ya Siporo, Rwego Ngarambe, na we yifurije Rayon Sports gukomeza urugendo rw'intsinzi, ashimangira ko yifuza ko ikomeza gutsinda kugeza isoje irushanwa yegukanye igikombe.

Rayon Sports yongeye kwandika amateka muri CECAFA Kagame Cup ya 2026 nyuma yo kwerekeza ku mukino wa nyuma ku nshuro ya mbere mu myaka 28 ishize. Rayon Sports yaherukaga ku mukino wa nyuma wa CECAFA mu mwaka w`1998 mu marushanwa yabereye muri Zanzibar, aho Rayon Sports yatahukanye igikombe muri iryo rushanwa. Rayon Sports yahise iba ikipe ya mbere mu Rwanda itwaye igikombe cya CECAFA ikivanye hanze.

Nyuma yo gusezerera Jamus SC, Rayon Sports isigaje intambwe imwe gusa ngo yegukane CECAFA Kagame Cup ku nshuro ya kabiri.

Ku mukino wa nyuma uteganyijwe ku wa Gatanu, tariki ya 7 Kanama 2026, kuri Stade Amahoro, Rayon Sports izahura na Gor Mahia yo muri Kenya, yabonye itike isezereye Al-Hilal SC yo muri Sudani kuri penaliti 8-7 nyuma y'uko amakipe yombi anganyije igitego 1-1 mu minota 120.