CECAFA Kagame Cup: Denis Omedi ntazakinira Gor Mahia muri kimwe cya kabiri
Umunya-Uganda, Denis Omedi, uheruka gutandukana na APR FC akerekeza muri Gor Mahia, ntabwo ari mu bakinnyi iyi kipe izifashisha mu mukino wa kimwe cya kabiri cya CECAFA Kagame iri kubera i Kigali kuko yari yarandikishijwe na APR FC yo mu Rwanda.
Yanditswe na Kayitankore Dieudonné•
Ku wa Kabiri, tariki ya 4 Kanama 2026, nibwo Gor Mahia yo muri Kenya izakina na Al Hilal SC kuri Kigali Pelé Stadium mu mukino wa kimwe cya kabiri muri CECAFA Kagame Cup, uzasiga hamenyekanye ikipe izagera ku mukino wa nyuma.
Ikipe ya Gormahia yari iherutse kugura abakinnyi bashya barimo na Denis Omedi wari umaze umwaka umwe n’igice muri APR FC.
Umutoza wa Gor Mahia, Charles Akonnor, yatangaje ko nubwo Omedi yamaze gusinya muri Gor Mahia, atakoreshwa muri iyi mikino ya CECAFA, bitewe nuko yari yarandikishijwe na APR FC mu babakinnyi izakoresha muri iri rushanwa.
Gusa, uyu mugande w`imyaka 32 y`amavuko, ntiyigeze akinishwa na APR FC muri CECAFA,ahubwo biza kurangira atandukanye nayo yerekeza muri Gormahia.
Kuri ubu, ikipe nshya ya Denis Omedi ariyo Gormahia FC, yemeje ko izatangira gukinisha uyu mugande usatira aca ku ruhande, nyuma y`iyi mikino ya CECAFA Kagame Cup, bivuze ko iyi kipe yo muri Kenya izakoresha abakinnyi yatangiranye nabo muri iri rushanwa.