CAF Women’s Champions League : Rayon Sports WFC mu itsinda rimwe n` amakipe yo muri Zanzibar na Eritrea na Sudani y`Epfo
Ikipe ya Rayon Sports WFC, ihagarariye u Rwanda mu majonjora ya ’CAF Women’s Champions League 2026’ yo mu karere ka CECAFA, yisanze mu itsinda A ririmo na Yei Joint Stars yo muri Sudani y’Epfo, Mafunzo WFC yo muri Zanzibar na Denden FC yo muri Eritrea.
Yanditswe na Kayitankore Dieudonné•
Ibi ni ibyavuye muri tombola yabereye kuri Stade Amahoro i Remera kuri uyu wa Kane, tariki ya 30 Nyakanga 2026, aho u Rwanda rwitegura kwakira imikino y’amajonjora y’uyu mwaka, izitabirwa n’amakipe 10 yo mu karere ka Afurika y’iburasirazuba n’iyo hagati.
Iri rishunwa ry`amakipe y`abagore, rizitabirwa n`amakipe azaza aturutse mu bihugu bya Djibouti, Eritrea, Ethiopia, Kenya, u Rwanda, Sudani y’Epfo, Tanzania, Uganda, u Burundi na Zanzibar.
Muri iyi tombola, ikipe ya Rayon Sports y`abagore ( Rayon Sports WFC), yisanze mu itsinda A, aho iri kumwe na yo muri Sudani y’Epfo, Mafunzo WFC yo muri Zanzibar na Denden FC yo muri Eritrea.
Mu yandi matsinda, itsinda B rigizwe na Commercial Bank of Ethiopia FC (CBE), Kawempe Muslim Ladies yo muri Uganda ndetse na FC Ujeco yo muri Djibouti.
Itsinda C ryo rigizwe na Simba Queens yo muri Tanzania, Kenya Police Bullets yo muri Kenya na Top Girls Academy yo mu Burundi.
Ikipe izitwara neza kurusha izindi muri aya majonjora ni yo izahagararira akarere ka CECAFA mu gikombe cya Afurika cy`amakipe yabaye aya mbere iwayo mu bagore "CAF Women’s Champions League " ya 2026.
Muri aya majonjora azabera mu Rwanda, ikipe ya Rayon Sports WFC iri mu makipe azaba ahanzwe amaso, dore izaba iri gukinira imbere y’abafana bayo, hakiyongeraho ko yagarukiye ku mukino wa nyuma w’amajonjora ya CECAFA mu mwaka wa 2025, aho yatsinzwe na JKT Queens yo muri Tanzania igitego 1-0 mu mikino yari yabereye muri Kenya.
Simba Queens yo muri Tanzania na CBE yo muri Ethiopia, ni amakipe yitezwe cyane, dore ko azwiho kuba yaregukanye igikombe cya CECAFA Women’s Champions League.