CAF Confederation Cup : Rayon Sports yatomboye Panthère yo muri Cameroun
Rayon Sports izatangirira urugendo rwayo muri Cameroun mu marushanwa ya CAF Confederation Cup, nyuma yo gutombora ikipe ya Panthère Sportive du Ndé mu ijonjora rya mbere. Iramutse ikomeje, ishobora guhura na Black Bulls yo muri Mozambique.
Yanditswe na Kayitankore Dieudonné•
Ibi byavuye muri Tombola y’iri rushanwa nyafurika yabereye i Cairo mu Misiri ku cyicaro gikuru cy’impuzamashyirahamwe y’umupira w’amaguru muri Afurika (CAF), kuri uyu wa Kane tariki ya 6 Kanama 2026.
Rayon Sports izahagararira u Rwanda muri iri rushanwa rihuza amakipe yatwaye ibikombe iwayo, yatomboye kuzahura na Panthère Sportive du Ndé mu ijonjora ry`ibanze.
Umukino ubanza uzabera muri Cameroun hagati ya tariki ya 4 n’iya 6 Nzeri 2026, mu gihe uwo kwishyura uteganyijwe kubera i Kigali hagati ya tariki ya 11 n’iya 13 Nzeri 2026.
Ni ku nshuro ya kabiri ikipe ya Rayon Sports na Panthère Sportive du Ndé zihuye mu marushanwa nyafurika, dore ko muri 2015, Rayon Sports yasezereye Panthère Sportive du Ndé muri CAF Confederation Cup.
Icyo gihe, Rayon Sports yatsinze umukino ubanza wabereye i Douala ku gitego 1-0 cyatsinzwe na Léo Uwambajimana, mbere yo kongera gutsindira i Kigali igitego 1-0 cya Isaac Muganza.
Ikipe izakomeza hagati ya Rayon Sports na Panthère Sportive du Ndé, izahura n’izaba yakomeje hagati ya Atomic Ngomé yo mu Birwa bya Comores na African Black Bulls yo muri Mozambique, mu ijonjora rya kabiri rizakinwa mu Ukwakira. African Black Bulls niyo ihabwa amahirwe yo gukomeza muri iki cyiciro.
Rayon Sports igiye gukina iyi mikino iri mu bihe byiza, nyuma yo kugera ku mukino wa nyuma wa CECAFA Kagame Cup 2026, aho izakina na Gor Mahia kuri uyu wa Gatanu.