CAF Confederation Cup: Black Bulls yatsindiye Rayon Sports i Kigali, itahana icyizere cy`amatsinda

Uyu mukino wabaye kuri uyu wa gatandatu tariki ya 17 Ukwakira 2026 muri Stade Amahoro.

Rayon Sports yari mu rugo, yatangiye isatira cyane ariko kubyaza umusaruro amahirwe yabonye bikanga.

Ku munota wa 23, Ganijuru Elie yahinduye umupira imbere y’izamu, Junior Kameni awuteye atawuhagaritse, umunyezamu wa Black Bulls, Jose Ventura Guirrugo awufata mu buryo bworoshye. Rayon Sports yakomeje kwiharira umupira no guhusha uburyo bw’ibitego. Ku munota wa 36, Ganijuru yongeye guhindura umupira mwiza, umunyezamu awukuraho awushyira hanze.

Igice cya mbere cyarangiye amakipe yombi anganya ubusa ku busa.

Mu gice cya kabiri, Black Bulls yo muri Mozambique yaje isatira cyane ari nako ibona koruneri nyinshi. Ku munota wa 54, koruneri yatewe neza, umupira ujya ku mutwe wa kapiteni Abdou Gueye atsinda igitego cya mbere (1-0).

Mu minota 60, Rayon Sports yahise ikanguka yongera gusatira cyane ariko umunyezamu wa Black Bulls Jose Ventura Guirrugo ayibera ibamba.

Umutoza Haringingo Francis yatangiye gukora impunduka, Atisso Kojo asimburwa na rutahizamu Sandja Bulaya. Rayon Sports yakomeje gusatira cyane ariko abakinnyi barimo Junior Kameni na Muderi Akbar bakananirwa kubyaza umusaruro uburyo babonye.

Ku munota wa 78, Ganijuru yafashe icyemezo azamukana umupira yihuta, ateye ishoti rikomeye, umunyezamu Jose Ventura awushyira muri koruneri.

Mu gihe Rayon yari ihugiye mu gusatira, Black Bulls yazamukanye umupira yihuta,Danilo Muze atera ishoti rikomeye atsinda igitego cya kabiri ku munota wa 95.

Umukino waje kurangira Black Bulls itsinze Rayon Sports ibitego 2-0. Kuri Rayon Sports, amahirwe yo gukomeza mu matsinda yasigaye ari macye cyane, mu gihe Black Bulls yo muri Mozambique, yo yatahanye icyizere cy`amatsinda, mbere y`umukino wo kwishyura uzabera iwayo ku wa gatandatu, tariki ya 24 Ukwakira 2026.