CAF Champions League : APR FC izatangirira muri RDC

Ibi ni ibyavuye muri tombola yuko amakipe azahura mu majonjora y`ibanze y`igikombe cya Afurika gihuza amakipe yabaye aya mbere iwayo "CAF Champions League " y`umwaka wa 2026/27, yabereye i Cairo mu Misiri, kuri uyu wa Kane tariki ya 6 Kanama 2026.

Iyo tombola yari iyobowe n`umunyarwanda Olivier Karekezi, wahoze ari kapiteni w`ikipe ya APR FC.

Ikipe ya APR FC yatomboye ikipe ya Les Aigles du Congo yo muri Repubulika Iharanira Demokarasi ya Congo ( RDC). Iyi kipe yarangije ari iya kabiri muri championnat ya RDC ( Linafoot) yo mu mwaka w` imikino wa 2025-2026.

Umukino ubanza uzabera muri RDC hagati ya tariki 4 na 6 Nzeri, mu gihe uwo kwishyura uzabera i Kigali hagati ya tariki 11 na 13 Nzeri 2026.

Ikipe ya APR FC yaherukaga guhura n`ikipe yo muri Repubulika Iharanira Demokarasi ya Congo mu marushanwa ya CAF Champions League mu mwaka wa 2010. Icyo gihe, APR FC yahuye na TP Mazembe muri kimwe cya cumi na gatandatu.

Ku mukino ubanza wabereye i Kigali, ikipe ya APR FC yatsinze TP Mazembe igitego kimwe ku busa, ariko iza gusezererwa na TP Mazembe nyuma yo gutsindwa ibitego 2-0 mu mukino wo kwishyura wabereye i Kinshassa muri RDC.

Hagati aho,ikipe izakomeza hagati ya APR FC na Les Aigles du Congo , izahura n`ikipe izakomeza hagati ya Zamalek SC yo mu Misiri na AS Port yo muri Djibouti, mu ijonjora rya kabiri rizakinwa mu Ukwakira 2026. Ikipe ya Zamalek SC yo mu Misiri niyo ihabwa amahirwe menshi yo gusezerera AS Port yo muri Djibouti, bisobanura ko mu gihe APR FC yakomeza , ifite amahirwe menshi yo kuzahura na Zamalek SC.

Biramutse bibaye,ikipe ya APR FC yaba igiye guhura n`amakipe yo mu Misiri ku nshuro eshatu zikurikiranya mu marushanwa ya CAF, nyuma yo guhura na Pyramids yo mu Misiri ku nshuro 2 zikurikiranya, aho APR FC yagiye isezererwa mu ijonjora rya kabiri.