Birasaba gusubika umukino wa Gorilla kugira ngo Kiyovu ikine na Mathare United
Ikipe ya Kiyovu Sports ishobora gukina na Mathare United yo muri Kenya, mu mukino wa gicuti uteganyijwe kuri uyu wa gatanu tariki 14 kamena 2026 kuri Kigali Pelé Stadium, mu gihe umukino yari ifitanye na Gorilla FC waramuka usubitswe. Uyu umukino uzaba ari uwa mbere ku mutoza mushya Marc Harrison.
Yanditswe na Kayitankore Dieudonné•
Ikipe ya Kiyovu Sports ikomeje kwitegura imikino ya Super Cup, izitabira kuri tariki 22 kamena 2026. Umutoza mushya w`iyi kipe, Marc Harrison, yayoboye imyitozo ye ya mbere kuri uyu wa gatatu tariki 12 kamena 2026 kuri Kigali Pelé Stadium i Nyamirambo.
Amakuru yizewe aturuka muri Kiyovu Sports, yemeza ko ikipe ya Mathare United yo muri Kenya, yemereye Kiyovu Sports ko bakina umukino wa gicuti kuri uyu wa gatanu tariki 14 kamena 2026 kuri Kigali Pelé Stadium. Gusa birasaba ko umukino ikipe ya Kiyovu Sports yari ifite na Gorilla FC uhinduriwa umunsi, dore ko Kiyovu Sports yagombaga gukina na Gorilla FC kuri uyu wa gatanu tariki 14 kamena 2026.
Uyu mukino wa gishuti, uzaba ari uwa mbere ku mutoza mushya wa Kiyovu Sports, Marc Harrison, wateguwe mu rwego rwo gufasha uyu mutoza gusuzuma neza urwego rw`abakinnyi be, nubwo batangiye imyitozo ataragera mu Rwanda. Buzaba ari n`uburyo bwiza bwo gutegura Super Cup, dore ko hazaba hasigaye icyumweru kimwe gusa ngo iryo rushanwa ritangire.
Kiyovu Sports imaze ibyumweru bibiri mu myitozo. Gusa iyo muri iki cyumweru niyo yitabiwe n`abakinnyi bose , harimo n`abashya bari bagiye mu biruhuko hanze y`igihugu bamaze kugera mu Rwanda, uretse umunyezamu James Desiré Bienvenu Jaoyang uri mu nzira.