BAL 2026: RSSB Tigers yageze ku mukino wa nyuma

Ikipe ya RSSB Tigers, ihagarariye uRwanda, yabonye itike yo kugera ku mukino wa nyuma mu mikino ya BAL iri kubera mu Rwanda, nyuma yo gusezerera Al Ahly yo mu Misiri. RSSB Tigers ibaye ikipe ya mbere yo mu Rwanda ibashije kugera ku mukino wa nyuma muri aya marushanwa ya Basketball.

Uyu mukino wa kimwe cya kabiri wo kwishyura wabaye ku mugoroba wo kuwa gatatu tariki 27 gicurasi 2026 kuri BK Arena i Remera mu mujyi wa Kigali. Ni umukino wagoranye mu duce tubiri twa mbere kubera ko amakipe yombi (RSSB Tigers na Al Ahly) yari yihagazeho.

Agace ka mbere karangiye amakipe yombi anganya amanota 24 kuri 24, ari nako byagenze mu gace ka kabiri kuko amakipe yombi yongeye kunganya amanota 26 kuri 26. Byari bigoye kumenya ikipe ihabwa amahirwe yo kwegukana intsinzi muri uwo mukino.

Mu gace ka gatatu k’umukino, nibwo ibintu byahindutse, dore ko ikipe ya RSSB Tigers yagarukanye imbaraga nyinshi, biza kuyifasha gutsinda Al Ahly amanota 30 kuri 26 ya Al Ahly.

Mu gace ka kane, ari nako ka nyuma, ikipe ya RSSB Tigers yakomeje kurusha Al Ahly, biza kurangira RSSB Tigers yegukanye intsinzi ku manota 26 kuri 21.

Umukino waje kurangira ikipe ya RSSB Tigers yo mu Rwanda itsinze Al Ahly yo mu Misiri amanota 106 kuri 97.

Oumar Ballo, Teafale Lenard na Craig Randall nibo bakinnyi bagize uruhare rukomeye mu musaruro w’ikipe ya RSSB Tigers. Bombi uko ari batatu batsindiye ikipe yabo amanota 69.

Oumar Ballo yatsinze amanota 20 muri uyu mukino, Graig Randall we yinjije amanota 30, naho Teafale Lenard atsinda amanota 19, byatumye ikipe ya RSSB Tigers ihigika Al Ahly muri kimwe cya kabiri.

Ku mukino wa nyuma, ikipe ya RSSB Tigers izahura n`ikipe iri bukomeze hagati ya Petro de Luanda yo muri Angola na Al Ahly Ly yo muri Libiya.

Kayitankore Dieudonne