APR FC : Fidali yasinye imyaka ibiri
Rutahizamu Uwiyaremye Fidali, wakiniraga ikipe ya Kiyovu Sports, yerekeje muri APR FC, aho yasinye amasezerano y'imyaka ibiri.
Yanditswe na Kayitankore Dieudonné•
Mu itangazo ikipe ya APR FC yashyize ku rubuga rwayo rwa X, kuri uyu wa 3 tariki 24 kamena 2026, APR FC yagize iti:
" APR FC yishimiye kubamenyesha ko yasinyishije Fidali Uwiyaremye aturutse muri Kiyovu Sports. Indi ntare nshya yinjiye mu muryango izanye ubwitange n'inyota yo kurwanira umukara n'umweru."
Fidali Uwiyaremye ni umwe muri ba rutahizamu bakomeye baranze shampiyona y'umwaka w'imikino wa 2025-2026. Yatsindiye ikipe ya Kiyovu Sport ibitego 11, binafasha Kiyovu Sport kurangiza shampiyona iri ku mwanya wa gatatu mu makipe yo mu Rwanda.
Fidali yarangije shampiyona ari ku mwanya wa kabiri mu banyarwanda batsinze ibitego byinshi, aza ku wa gatanu muri rusange. Uyu musaruro wamufashije guhamagarwa mu ikipe y'igihugu y'uRwanda "Amavubi."
Muri APR, Fidali Uwiyaremye agiye guhanganira umwanya n'umunya-Cote d'Ivoire William Togui Mel. Aje akurikira umunyarwanda ukina hagati, Rubuguza Jean Pierre wavuye muri Gicumbi FC, n'umunya-Cote d'Ivoire usatira aca ku ruhande Amani Kouadiokan.
Uretse abakinnyi bashya ikipe ya APR FC yasinyishije, yongeye amasezerano umunyezamu wayo w`umunyarwanda Ishimwe Pierre. Biteganyijwe ko myugariro wayo Nshimiyimana Yunussu nawe azongera amasezerano muri iyi kipe y`ingabo z`igihugu.
APR FC ikomeje kwitegura amarushanwa mpuzamahanga izitabira harimo CECAFA Kagame Cup izabera mu Rwanda na CAF Champion`s League.