Amavubi yatangiriye ku ntsinzi mu rugendo rwa AFCON 2027

Iyi ntsinzi yahaye u Rwanda amanota atatu ya mbere mu itsinda ruhuriyemo na Mali, Cape Verde na Liberia, mu marushanwa yo gushaka itike y’igikombe kizabera muri Kenya, Tanzania na Uganda.

Amavubi yerekanye ubushake bwo gutangira neza umukino, kuko Biramahire Abeddy yafunguye amazamu ku munota wa kabiri gusa. Iki gitego cyahaye u Rwanda imbaraga zo gukomeza gukina rushaka kongera ibitego.

Ku munota wa 33, Leroy-Jacques Mickels yongeye kunyeganyeza inshundura za Liberia, bituma Amavubi yongera ikinyuranyo. Gusa abashyitsi ntibacitse intege, kuko Sylvanus Nimely yabashije kubonera Liberia igitego cyo kwishyura ku munota wa 38.

Mbere y’uko amakipe ajya kuruhuka, u Rwanda rwabonye penaliti nyuma y’ikosa ryakorewe mu rubuga rw’amahina. Joy-Lance Mickels ni we wahawe inshingano zo kuyitera, ayinjiza neza mu izamu, bituma Amavubi ajya kuruhuka ayoboye n’ibitego 3-1.

Mu gice cya kabiri, Liberia yagerageje kongera imbaraga kugira ngo igabanye ikinyuranyo, ariko Amavubi akomeza gukina yitwararika no kurinda umusaruro yari yabonye mu gice cya mbere.

Ibintu byarushijeho kugora Liberia ubwo yasigaraga ari abakinnyi 10 nyuma y’uko umwe mu bakinnyi bayo ahawe ikarita itukura. Nubwo Amavubi atongeye kubona igitego, yashoboye kubungabunga ibyo yagezeho kugeza ku munota wa nyuma.

Umusifuzi yahise arangiza umukino Amavubi yegukanye intsinzi ya 3-1, atangirana urugendo rwo gushaka itike ya AFCON 2027 amanota atatu. Iyi ntsinzi kandi yashimangiye ko u Rwanda rwatangiye neza imikino yo mu Itsinda K.

Umukino ukurikira w’Amavubi uzaba ku wa 29 Nzeri 2026, ubwo azasura Cape Verde i Praia. Ni umukino wa kabiri mu mikino ibiri ya mbere u Rwanda ruzakina muri uru rugendo rwo gushaka itike y’Igikombe cya Afurika cya 2027.