Amavubi U20: Cassa Mbungo wagizwe umutoza mushya, yahamagaye abazakina CECAFA
Cassa Mbungo Andre niwe mutoza mushya w`ikipe y’igihugu y’u Rwanda y’abatarengeje imyaka 20 ( Amavubi U20), anahamagara abakinnyi azifashisha mu mikino ya CECAFA yo gushaka itike y’igikombe cya Afurika izabera muri Tanzania.
Yanditswe na Kayitankore Dieudonné•
Kuri uyu wa Mbere, tariki ya 7 Nzeri 2026, ni bwo ishyirahamwe ry’Umupira w’Amaguru mu Rwanda (FERWAFA), ryatangaje abatoza ndetse n’abakinnyi b’ikipe y’igihugu y’u Rwanda ‘Amavubi’ U-20.
Cassa Mbungo Andre niwe yagizwe umutoza mukuru w`Amavubi y`abatarengeje imyaka 20. Azungirizwa na Ntamuhanga Tumaine wo muri Kigali FC, mu gihe Peter Otema wa Bugesera FC yagizwe umutoza wongera imbaraga,ndetse na Aime Desiré Ndanda uzatoza abazamu.
Aba batoza bahise bahamagara abakinnyi bazitabaza mu mikino ihuza ibihugu byo muri Afurika y’Iburasirazuba n’iyo Hagati (CECAFA), mu gushaka itike y’Igikombe cya Afurika.
Abanyezamu bahamagawe ni Kabera Bonheur (MARINE FC), Nsengumuremyi Alfa (Mahembe FTC) na Mugisha Claude (Gasogi United).
Ba myugariro ni Ukwiyegukundwa Aloys (Motard FC), Igiraneza David (Police FC), Gisubizo Emmanuel (FC Bayern Academy), Tuyishimwe Kennedy (Mukura FC), Ishimwe Fredy (Tony FC), Cyusa Fiston (Police FC), Sheja Djibril (Tony Academy), Niyompano Pacifique (Gasogi United).
Abakina mu kibuga hagati bahamagawe ni Nkundukuri M. Leon (Gasogi United), Mugisha Irene (AS Kigali), Byiringiro Thierry (Gasogi United), Taufick Manzi (Police FC), Ndungutse Assouman (APR FC), Nshimiyimana K. Celestin (Gorilla FC), Dushime Claude (Tony Academy).
Ba rutahizamu ni Ishimwe Aimee Thierry (Gorilla FC), Uwineza Rene (Intare FC), Mutembe Poul (Police FC), Mugunga Daniel (Tony Academy), Nshimiyimana Olivier (FC Bayern Academy), Nshimiyimana Obed (Kiyovu SC) na Hagenimana Eric (Marine FC).
Ikipe y’u Rwanda iri mu itsinda A, aho iri kumwe na Ethiopia na Tanzania izakira irushanwa. Gusa Amavubi yatinze gutangira imyitegura ku mpamvu bitewe nuko hari hataraboneka ingengo y’imari izatuma yitabira, ariko ku bufatanye bwa FERWAFA na Minisiteri ya Siporo, iraboneka bihabwa umurongo.
Itsinda B irimo Uganda, Sudani na Djibouti, naho Itsinda C rikabamo Sudani y’Epfo, u Burundi na Kenya.
Amakipe atatu azasoza ari aya mbere mu matsinda muri iri rushanwa, azahita abona itike yo gukina imikino ya ½, hakiyongeraho ikipe yabaye iya kabiri nziza kurusha izindi.
Amakipe abiri azagera ku mukino wa nyuma, azahita ahagararira Akarere ka Afurika y’Iburasirazuba n’iyo Hagati, mu Gikombe cya Afurika cya 2027 kizabera muri Ghana.
Iri rushanwa rizakinwa kuva tariki ya 15 kugeza ku ya 25 Nzeri 2026, ribere ku kibuga cya Uhuru Stadium iri Dar es Salaam muri Tanzania. Iki kibuga cyavuguruwe mu rwego rwo kwitegura Igikombe cya Afurika cya 2027.