Al Hilal yanze miliyoni 1.5$ y`amadolari yahabwaga na Pyramids FC kuri Girumugisha
Ikipe ya Pyramids FC yo mu Misiri yagerageje kugura rutahizamu ukomoka mu Burundi Jean-Claude Girumugisha, itanga miliyoni 1.5 z'Amadolari ya Amerika, ariko Al Hilal yo muri Sudani ihita iyitera utwatsi.
Yanditswe na Ishimwe Walter•
Amakuru aturuka hafi y'iyi kipe agaragaza ko Al Hilal idateganya kugurisha uyu mukinnyi keretse habonetse ikipe yemera gutanga amafaranga agera kuri miliyoni 5 z'Amadolari ya Amerika, ari na yo gaciro iyi kipe imuha.
Bivugwa ko Al Hilal idashaka kugabanya ayo mafaranga isaba, nubwo ishobora kwemera makeya kuri ayo, mu gihe hari ikipe ikomeye yo ku Mugabane w'u Burayi yakwinjira mu rugamba rwo kumushaka.
Jean-Claude Girumugisha amaze kwigaragaza nk'umwe mu bakinnyi b'imbere bafite impano idasanzwe mu karere ka Afurika y'iburasirazuba n'iyo hagati. Uretse gufasha Al Hilal kwegukana igikombe cya shampiyona, ni na we uhabwa amahirwe menshi yo kwegukana igihembo cy'umukinnyi mwiza wa shampiyona y'u Rwanda (BK Pro League) cya 2025/26.
Uyu mukinnyi ushobora gukina neza ku mpande zombi z'ubusatirizi, azwiho umuvuduko udasanzwe, ubuhanga bwo kugumana umupira ku kirenge ndetse no gucenga ba myugariro mu bihe byo guhangana umwe kuri umwe, ibintu byatumye yifuzwa n'amakipe menshi akomeye muri aka karere.